Два кратких слова: отец Матфей, но очень многое в них!
Слыша в детстве рассказы о нём, мы верили: чудо есть, а утешение будет.
И теперь, «в стране далече», мы помним о старце, зная его как символ Яранска.
Акафист создан в конце 1990 х годов, и уже не видишь своё авторство. Он от того мгновения, когда слово о старце искало выхода. И трудно поверить, что вновь займёшься подобным трудом.
В акафисте не один голос: хранители предания о старце тоже хотят славословить. Народ не умолчит о своих героях.
Может исчезнуть Яранск, но останется эта «намоленная» земля, как и любовь преподобного. Ведь, по Писанию, любовь «никогда не перестаёт, хотя… и языки умолкнут, и знание упразднится» (1 Кор. 13, 8).
И если приблизится смерть, вспомним Яранск, старца — и станет, конечно, легче. Вечная, светлая память — это об отце Матфее. Пусть же не оскорбится она этим скромным, непритязательным приношением!
(Редакция не посягает на прерогативу РПЦ печатать богослужебные тексты, а публикует акафист как произведение художественной литературы и знак большого почитания святого за пределами Вятского края. Святому может быть посвящено несколько акафистов. Текст акафиста печатается в редакции автора.)
Избранный чудотворче, многопетый подвижниче Христов, теплый заступниче и молитвенниче наш благосердый, преподобне отче Матфее! Восхваляюще явившаго тя Господа, восписуем ти похвальная. Ты же, предстоя престолу Вседержителя, молися неусыпно о нас, зовущих: «Радуйся, преподобне отче наш Матфее, чудесы твоими дивно прославленный».
Ангели на небесех возрадовашася прославлению твоему, богоносне, якоже утвердил еси житием всехвальным спасительную веру Христову. И ныне напаяеши мнозех христолюбцев, святче, от источника световодительных чудес твоих, имиже облагоухал еси землю нашу. Сего ради достоин еси песнь слышати сицевую: «Радуйся, Христу вселично себе предавый; радуйся, святое возношение Ему возносивый. Радуйся, в добродеянии неоскудно плодоносивый; радуйся, яко велелепое светило нам явивыйся. Радуйся, яко ливан, душею твоею благоухавый; радуйся, в вечную славу о Христе призванный. Радуйся, путем многотрудным на небеса восшедый; радуйся и ныне тамо о нас моляяйся. Радуйся, преподобне отче наш Матфее, чудесы твоими дивно прославленный».
Видяще родители твои, отче, благодать православия, не токмо сами ко храму Господню приметашася; обаче и чад своих тщашася от Таинств Христовых богатно напитати, да и тии научатся немолчными усты воспевати Богу: аллилуия.
Разумение святыни церковней издетска даровася ти, отче Матфее, егда со родители твоими в богоспасаемем граде Вятке живяше: колико раз убегал еси во храм Господень, идеже един усердную молитву Богу творил еси, прознаменуя грядущия лученосныя подвиги твоя. Мы же, дивящеся таковому исконному богочестию твоему, взываем ти сице: «Радуйся, к сыном Божиим причисленный; радуйся, измлада благостоянием украшенный. Радуйся, любы мира сего презревый; радуйся, всем естеством Христу повиновавыйся. Радуйся, стези правы ногама твоима прошедый; радуйся, словесное и нелестное млеко чадом даяти возлюбивый. Радуйся, во святость Господем призванный; радуйся, Того единога в сердцы своем освятивый. Радуйся, преподобне отче наш Матфее, чудесы твоими дивно прославленный».
Сила Божия укрепляше тя, преподобне, егда по смерти отца твоего оставил еси дом свой ради насущных трудов телесных. Тогда же внуши ти Христос, восприявый тя, возжеление к Писанию Божественному. С Его же помощию наедине и постигл еси книжную премудрость, во еже Писание читати, непрестанно взывая к Умудрившему тя: аллилуия.
Имея тщание зельное, мирскаго мятежа уклонитися, ко старцу Стефану притекл еси, преподобне, да даст ти благословение на путь иноческаго делания. Сей же всечестный пастырь призва тя прежде молитве Иисусове научитися, преклонению выи своея под благое ярмо Божие, смирению и разсуждению доброразсудному. Оттоле, непреткновенно пред всеми ходя, кротостию и благонравием украшенный, наипаче к молитве сей, из глубины сердца изливаемой, прилежал еси, отче Матфее, восходя от силы в силу. Мы же, воспевая богозарное рачение твое ко Господу, возглашаем ти тако: «Радуйся, от юности учению духовному предававыйся; радуйся, и до седин мудрость находивый. Радуйся, путь житейскаго преуспеяния отвергший; радуйся, нищетою Христа обогативыйся. Радуйся, мирския радости во уметы вменивый; радуйся, страхом Господним сердце твое усладивый. Радуйся, чресла помышления молитвою препоясавый; радуйся, смиривыйся пред Господем, Имже вознесенный. Радуйся, преподобне отче наш Матфее, чудесы твоими дивно прославленный».
Бурю искушений и напастей претерпел еси, святче, на поприщи жития твоего мирскаго, единаго точию на потребу желая, еже како Господеви угодити. Егда же достигл еси проочищения духовнаго, преподобне, благослови ти Той спасатися во обители иночестей во имя святаго князя Александра, аможе вселившись, радостно воспел еси Богу: аллилуия.
Слышанием словес евангельских умудряясь, непостыдно трудяшеся, отче, во обители святей, в послушание братии всей себе вверяя. В бдениих и постничестве преуспевая, предначаше стяжавати многоразличны дары духовны. Иноческий постриг твой, святче, во имя Матфея Прозорливаго, преподобнаго Киево-Печерскаго, прообрази един от сих даров. Мы же, постигая еже о тебе Божие промышление, со умилением песнословим ти сицевая: «Радуйся, под руку Божию смиривыйся; радуйся, кротостию душу твою прославивый. Радуйся, братство нелестно возлюбивый; радуйся, во всяком благочестии и чистоте трудивыйся. Радуйся, глаголы евангельскими вооруживыйся; радуйся, душу твою в послушании Истине очистивый. Радуйся, дары Божии в себе неусыпно возгревавый; радуйся, благословеньми от Христа богативыйся. Радуйся, преподобне отче наш Матфее, чудесы твоими дивно прославленный».
Божественныя дары в тебе, отче Матфее, разумея, прихождаху к ти христоименитии людие страны Вятстей ради совета духовнаго и утешения. Ты же отсылал еси таковых ко настоятелю и братии твоей, ины паче себе честию творя. Елицы же неотступно к ти прибегаху, имеяху благое от тебе укрепление, утверждаясь в вере православней, Господеви же поя: аллилуия.
Насельники Яранского Пророчицкого монастыря.
Слева во втором ряду четвертый — о. Матфей.
Конец августа — начало сентября 1902 года.
Видя сокровище спасительнаго учения в книзех почившаго наставника твоего, Стефана, колькраты бывал еси, святче, на могиле того. Тамо открыхся у ти, отче, источник слез сердечных, иже вкупе со даром молитвы Иисусовы, кую и нощию творил еси, поставляше тя в мужа совершенна и богоносна. Темже мы вси, таковому добротолюбию твоему дивящеся, вопием ти: «Радуйся, наставника твоего благоговейне поминавый; радуйся, вере его нелицемерней подражавый. Радуйся, благому подобником себе поставивый; радуйся, паче всего хранимаго сердце свое хранивый. Радуйся, укорения к себе во блаженство вменивый; радуйся, в молитвах немолчных трезвивыйся. Радуйся, любовию твоею закон исполнивый; радуйся, немощи немощных на себе носивый. Радуйся, преподобне отче наш Матфее, чудесы твоими дивно прославленный».
Проповедует земля Яранская подвиги твоя, достохвальне, аможе во Пророчицкую обитель благоотишную преселился еси, волю Господню о тебе исполняя. И тамо светильник, на версе горы стоящий, тако же явился еси, призывая верных воспевати благих подателю Богу: аллилуия.
Возсиял еси любовию ко Господу, отче священне, в служениих церковных на всяк день подвизаясь, никоих трудов ради братии твоей гнушаясь. Темже и возвеличи тя Вседержитель: тако без совета твоего, отче, игумен обители Геннадий ничесоже творяше, волю Божию в советех твоих чая уведати. Мы же, зряще преизрядное усердие твое ко Господу, с благоговением глаголем ти сицевая: «Радуйся, строителем благодати Божия явивыйся; радуйся, непорочно путем Господним ходивый. Радуйся, день бо и нощь делающе, Тому угодивый; радуйся, сосуд твой во святыни и чести стяжавый. Радуйся, без роптания и раздражения вся творивый; радуйся, во благочестии братолюбие подававый. Радуйся, Христу себе умерщвлявый; радуйся, святое хранивше, освятивыйся. Радуйся, преподобне отче наш Матфее, чудесы твоими дивно прославленный».
Хотение единое имея, еже точию со Христом сочтаватися, презрел еси, блаженне, прелести мира сего, в безмолвии и молитве время превождая. Кто доволен изрещи небомысленное желание твое ко Господу, Емуже немолчными усты выну воспевал еси: аллилуия.
Новаго видим в тебе светоносца божественнаго, в прославление небесоподобнаго иноческаго жития явленнаго. Обаче и древних отцев подобник показался еси, непомерным терпением с ними сравнимый. Тако и непопечительностию о самем себе достоин еси удивления. Мы же, взирая на славныя подвиги твоя о Господе, вопием ти таковая: «Радуйся, от стихий мира со Христом умерый; радуйся, ангелов собеседниче предивный. Радуйся, язык твой от греха хранивый; радуйся, Господем в лепоту облеченный. Радуйся, во благодати Божия возмогавый; радуйся, язву телесную терпя, добро творивый. Радуйся, в долготерпении сердце твое утвердивый; радуйся, венец славы неувядаемый приемый. Радуйся, преподобне отче наш Матфее, чудесы твоими дивно прославленный».
Странное чудо предстало есть пред нами изрядное смирение твое, егоже в основание терпения полагал еси, отче. Якоже и в болезнех твоих, тако и стрелами злословия уязвляемый, преизлиха благодарил еси Бога, радостно поя Ему: аллилуия.
Весь еси смирение, преподобне, и смерть безгодную готов бысть без ропота прияти, юже чаяше аки приобретение имети, земное житие во Христе полагая. Темже и на кресте твоем могильнем титло «Матфей–кочегар» повелел еси учинити. Мы же, восхваляя тя за добродетели твоя, взываем ти сице: «Радуйся, истиною выю твою обязавый; радуйся, во вся оружия Божия облекийся. Радуйся, чиста и непреткновенна себе соделавый; радуйся, плоды духовны во всякой благостыни стяжавый. Радуйся, благообразно житие твое прошедый; радуйся, Господа непрестанно благодаривый. Радуйся, мир Божий в сердцы твоем водворивый; радуйся, в подвизе добрем течение скончавый. Радуйся, преподобне отче наш Матфее, чудесы твоими дивно прославленный».
Все множество чад твоих духовных знаху тя яко избранника Божия, дар прозорливства и пророчествия в себе носяща. Не сокрыты быша от тебе и грядущия беды Отечества нашего. Веруя же в неизследную милость Божию, ты рекл еси, преподобне, яко на крови мучеников взыдет святости древо. Сих ради даров твоих, святче, достойно есть пети явившему тя Богу: аллилуия.
Ветии доброглаголивии всуе тщались бы изрещи богомудрие твое, блаженне: безсильна убо зде речь человеча. Кто исповесть, еже како и архиереом Виктору, Нектарию и Пахомию мучения от безбожных прорекл еси, еже како и тое предглаголал еси, яко села, идеже пронесут гроб твой, никогдаже градом побиты будут. Недоумеяся неизреченных даров твоих от Господа, песновоспеваем ти тако: «Радуйся, грядущая яко настоящая провидевый; радуйся, во устех твоих мудрость хранивый. Радуйся, время молчати и говорити знавый; радуйся, глашатаем судеб Господних послуживый. Радуйся, о пронареченных скорбех страны нашея рыдавый; радуйся, искупующе время, к покаянию всех призывавый. Радуйся, богомудрыя словеса твоя солию растворивый; радуйся, печатию избрания Божия отмеченный. Радуйся, преподобне отче наш Матфее, чудесы твоими дивно прославленный».
Спасительным речам твоим во еже внимати, блаженне, еще усерднее притекаху к ти людие православнии, егда при властех безбожных в миру поселитися принужден бысть. Ни един отходи от тебе неутешен, понеже, яко отец чадом своим, бяше всем приходящим к ти. Богу же призывал еси пети: аллилуия.
Стена несокрушимая Православия явился еси, отче, в годину страшных испытаний. Сам же, и смерти не бояся, бояшеся славы людския, да не прогневши Христа Жизнодавца, Емуже подражая, в притчах вещал еси пути спасения всем прибегающим к ти. Сего ради достоин еси песнь слышати таковую: «Радуйся, изнемогающих верою наказателю; радуйся, младенцев духовных обучителю. Радуйся, овех словесы теплыми укрепивый; радуйся, овех же страхом Суда Божия спасавый. Радуйся, с кротостию противныя наставивый; радуйся ослабленныя руки мнозех исправивый. Радуйся, милость миру у Господа просивый; радуйся, жертву хваления Тому возносивый. Радуйся, преподобне отче наш Матфее, чудесы твоими дивно прославленный».
Часовня о. Матфея на Яранском Вознесенском кладбище.
Пение непрестанное Христу Вседержителю у престола Его ныне приносяща вемы тя, отче богоносне, яко теплаго предстателя и чудодейственника, чудесы твоими нас умудряюща, да зовем выну Богу: аллилуия.
Светоподательна светильника, милостию Божией для нас возженнаго, хвалим тя, преподобне отче, якоже и ныне от недугов многоразличных нас исцеляеши, душевных вкупе и телесных, простираеши к нам благодатнеи руце твои. Кто с верою приходяще, отиде от тебе тощ: всем бо твориши ко их спасению. Темже приими от нас умеленную песнь сию: «Радуйся, немощныя заступаяй; радуйся, малодушныя утешаяй. Радуйся, ухо твое к страждущим приклоняяй; радуйся, любовию велией к нам пламенеяй. Радуйся, в годину глада много помогавый; радуйся, Православие в чадех твоих укрепивый. Радуйся, и видимо к нам приходяяй; радуйся, чудотворче, ко Христу нас ведяяй. Радуйся, преподобне отче наш Матфее, чудесы твоими дивно прославленный».
Благодатным житием твоим Христа прославивше, преизрядную любовь народа церковнаго стяжал еси, приснохвальне. Тако умерша тя многая поприща чада твоя на руках во град Яранск несоша к месту упокоения твоего, якоже ход крестный творяще, Богу же взывая: аллилуия.
Поюще достолепныя подвиги твоя, блаженне, видяще велию любовь твою к нам, многогрешным, радостно возглашаем ти тако: «Радуйся, чудес неоскудеваемое сокровище; радуйся, благоутробия бесконечный источниче. Радуйся, крине Христов благоуханный; радуйся, наставниче наш возжеленный. Радуйся, града Яранска прелюбимое похваление; радуйся, страны Вятския благолепое украшение. Радуйся, земли нашея защищение; радуйся, Православия утверждение. Радуйся, преподобне отче наш Матфее, чудесы твоими дивно прославленный».